ليش رحتي ؟… شعر عبدالامير الديراوي

إلى التي رحلت وفي فمها كلمات لم تقلها بعد إلى زوجتي الغالية  أم ألهام …….

 

ليش رحتي أمدللة وعفتي الدلال

                             وعفتي أولادي ومحبتي وبيتي

وعفتي كل ما عندي من شوك وحنان

                          وحته تاريخ المحبة أنسيتي

يا ضوه عيوني عليش أيشح ضواج

                         ومنهو اليلم كبرتي وتاليتي

ماهي معقوله تبخلين بهواج

                      وكل بساتين العشك روّيتي

كلشي راح اوياج نومي ومشتهاي

                       وراح حته النظر وي عافيتي

أتغيرت بعدج هواجيس الحياة

                      وانكلب نوحي غنه لتسليتي

جنت أتمنى اللحد يوسع اثنين

                    ردت اقسمه اوياج هاي امنيتي

اتحيرت شحجي وتصاويرج شهود

                  قصدي اراويج الصور ما جيتي

يالحن حبنه الاسمعه بكل صباح

                   صار أنشودة وتبث تعزيتي

اليروح بعيد يوصي بالعزيز

                  ليش بيّه اشبيج ما وصيتي ؟

شرد أجاوب من  يوجهولي السؤال

                    ابسرعه عنّي امشيتي واتخلّيتي

يامحطاتي وهدوئي ومستحاي

                    وياعمد بيتي وأسس تربيتي

انتي شيّدتي صرح هذا البناء

                     وعالمحبة وعالحنان ابنيتي

أشكثر ما طال العمر وياج يوم

                      وجّنه ساعه اشكثر ما عديتي

ألمن اكتب بعد  من يقره الحروف؟

                   وانتي كل صفحات حبنه اطويتي

لا مقالاتي ولا شعري يفيد؟

                    وجنت ادوّن كلشي يمي احجيتي

انه ألوم الناس لو حزنت سنين

                 وياما من حزني اشكثر عانيتي

هيّه أيام وأتبعج عالطريج

                وسفه والله أشعجب ما تانيتي ؟

شنهي وأشباقيلي بالدنيه بلاج

               غير ذكراج وخلك خاجيتي

انتي مريم بالعفاف وبالكمال

                وزينب انتي بكثر ما ضحيّتي

وانتي سالوفه الزمن يطريها دوم

         وباقي ذكرج وين ما حليّتي

مثل طيبج ما انوجد بين النساء

                  وياما من فيض الوفاء أشكيتي

ياسلام الله على نور البديج

                وعلى أرباج ونعم ما ربيتّي

عاشك آنه  وأنتي معشوكة صباي

              يا غرامي ونايلي وأغنيتي

يا خليلة عمري ما يوصف غلاج

            أي وحك الله أنتي بس غاليتي

بيا كلام أرثيج وأكتبلج رثاء

                  ومنهو يتلي أسطورها لمرثيتي؟

الموت ياخذنه جميعا لا محال

                وتنكطع من ريتج ومن ريتي   

كل جرح ينراف بس جرحج غميج

                وياما لجروحي أشكثر داريتي

مستحيل أبجي أعله غيرج مستحيل

                ولا شفت مرّه أعله غيري أبجيتي

ألبجي بس ألنه أنوجد أحنه ألاثنين

                وأنتي قانون الحزن سنّيتي            

 

                   

 

 

 

Advertisements

اترك رد

إملأ الحقول أدناه بالمعلومات المناسبة أو إضغط على إحدى الأيقونات لتسجيل الدخول:

WordPress.com Logo

أنت تعلق بإستخدام حساب WordPress.com. تسجيل خروج   / تغيير )

صورة تويتر

أنت تعلق بإستخدام حساب Twitter. تسجيل خروج   / تغيير )

Facebook photo

أنت تعلق بإستخدام حساب Facebook. تسجيل خروج   / تغيير )

Google+ photo

أنت تعلق بإستخدام حساب Google+. تسجيل خروج   / تغيير )

Connecting to %s

%d مدونون معجبون بهذه: